Ang “coin hoarding” ay pangongolekta ng napakaraming barya, partikular ang mga baryang kasalukuyan po nating ginagamit sa sirkulasyon. Meron po talagang mga taong nangongolekta ng mga barya ng sobra-sobra kung saan ang mga ito ay umaabot ng ilang mga sako. Ang gawain po na ito ay mahigpit pong ipinagbabawal dito sa Pilipinas o ating bansa.
Meron pong kaukulang parusa ang sinumang mahuhuli na nangongolekta ng napakaraming barya. At eto po ay pinag-iisipan ng ating mga mambabatas na bigyan ng mabigat na parusa ang mga taong gumagawa sa bagay na ito.
Ayon po sa aking nakalap na impormasyon, kung lahat ng mga barya sa sirkulasyon na inilabas ng BSP dito sa Pilipinas ay paghahati-hatian ng bawat Pilipino. Ang bawat isa sa atin ay may makakatanggap ng 184 na pirasong barya. Samantala, sa ibang bansa dito sa Asya, umaabot lamang sila sa 100 na pirasong barya ang bawat isa.
Nagkukulang ang ating mga Barya sa Sirkulasyon
Sadyang mas marami ang mga baryang inilabas ng Bangko Sentral para ating magamit sa sirkulasyon kumpara sa ibang bansa dito sa Asya. Ngunit ang BSP ay patuloy pong nagkakaproblema dahil sa nagkukulang po talaga ang ating mga barya sa sirkulasyon.
Ano nga ba ang tunay na dahilan kung bakit nagkukulang ang ating mga barya sa sirkulasyon?
Ayon po sa kanila, ang pinaka dahilan sa kakulangan ng mga barya sa sirkulasyon ay ang “coin hoarding” o ang mga taong nangongolekta ng mga barya ng labis at sobra. Ang gawain na ito ay nagdudulot po ito ng masamang epekto sa ating ekonomiya.
Ang karaniwang dahilan kung bakit may mga taong nangongolekta ng napakaraming barya ay dahil sa mas mataas ang tunay na halaga ng mga ito kumpara sa nakasaad na face-value ng mga ito. Ang ikinatatakot dito ng Bangko Sentral ay maaaring tunawin ang mga ito bago ibenta. At kung ito ang siyang ginagawa ng mga “coin hoarders”, tuluyang mababawasan at magkukulang ang ating mga barya sa sirkulasyon.
Ang Parusa sa Coin Hoarding
Malaki po talaga ang epekto ng coin hoarding sa ating ekonomiya dahil sa kakulangan ng mga barya na ating ginagamit sa pagbili ng mga produkto at serbisyo. Kaya kailangan po itong solusyunan sa madaling panahon. At ang isang nakikitang solusyon ng ating mga mambabatas ay ang bigyan ng mas mabigat na parusa ang mga taong mahuling sangkot sa coin hoarding.
Sa ngayon ay pinag-uusapan pa lamang po ang mas mabigat na parusa sa mga coin hoarders. Dalawang ito at ang una ay ang pagkakakulong ng isang taon. Ang pangalawa naman ay ang multa na nasa halagang 100,000 pesos sa kada 1,000 na pirasong barya. Kaya kung meron po tayong tinatagong 10,000 na pirasong barya, aabot na po sa isang milyon ang ating magiging multa.
Pagkakaiba ng Coin Collecting sa Coin Hoarding
Pareho lamang nga ba ang coin collecting sa coin hoarding?
Ang coin collecting ay isang libangan na pangongolekta ng mga barya. Ngunit ang pagkakaiba po nito sa coin hoarding ay hindi po maramihan ang mga baryang kinokolekta ng isang kolektor. Ako po ay isang kolektor at nasa isa o dalawang piraso lamang na iba’t ibang bersyon ng mga barya na aking kinokolekta. Ang among layunin sa pangongolekta ng mga barya ay para kumpletuhin ang aming koleksyon.
Samantala, ang mga coin hoarders naman po ay wala silang limitasyon sa bilang ng mga barya na kanilang kinokolekta.
Paano naman ang pag-iipon sa ating alkansya? Maituturing rin po ba na ito ay coin hoarding?
Ayon po sa aking pagsasaliksik, ang pag-iipon ng mga barya gamit ang ating alkansya ay hindi naman daw po ito ipinagbabawal o masasabing coin hoarding. Pero nakadependi parin po ito sa sukat ng ating alkansya. Kailangan po na ang ating alkansya ay hindi naman sobrang laki kung saan ay maaari nating ihambing sa sukat ng isang malaking drum.
At ayan po mga ka-barya. Uulitin ko po mga ka-barya, illegal po ang coin hoarding o pangongolekta ng napakaraming barya dito sa Pilipinas. Meron pong isang mabigat na parusa ang sinumang mahuhuli sa gawain na ito.
Walang komento:
Mag-post ng isang Komento